Psa 78 | MMX | STEP | Limixin tarak, minang tonga ka i na levenanasa rak, la minam doma mumu lempanga nia ana paase i.

Psalms 78

Moroa Eburu Mi Limixin Teren

1 Limixin tarak, minang tonga ka i na levenanasa rak, la minam doma mumu lempanga nia ana paase i. 2 Anaba paase mi levempapaase dokdoxoma kusu ana re musumus levempanga megano ua gak lox alipe. 3 Levelinga ua tagara ronga vam i la tagaklen i, mo levelinga ua luvuttemen dik diga tong i ridik. 4 Atoxo lok pepe i na at laxamdak mi laxaalik atnedik; ataba tere i ri mo lavaola dibap tavasu melemu mumu mo lolos at Leeme Silok, la leven gugu silok teren la levempanga maraanu ua neni gara lok pam i. 5 Neni ga raba leventaangas mokmokso ri limixin me Israel la Lenavolo ri livipisik li at ne Jakop. Neni ga paase alolos i ri lavalabat atnedik kusu dinaba anasa laxamdak mi laxaalik atnedi mi Lenavolo, 6 kusu mo lavaola melemu dinabakleklen i la dinaba tere avolo box i ri luvutnitna di. 7 La mumu mun na langas, dinaba nuunu saga rinotno at ne Moroa la dinoxom domampe lempanga neni garak lok pam i, ketla diba mumu asu amisik Lenavolo ren. 8 Dinoxok lok ngan lavalabat atnedi ua diga ganggang linga, la digang tonga xepe amisik teren; la lesepsep sogo atnedi ri ne Moroa goxo lolos la di goxo mumu asu amisix i.

9 Leme Epraem, diga ruuna laxanbonara eburu mi levesoso, diga sixiro at laaleng at leesep. 10 Diga los polo lekabus atnedi mi ne Moroa; la di goxopara na ronga res at Lenavolo ren. 11 Diga domampe lempanga neni ga lok pam i, i ngan mo lempanga sangsangu ni ga lox i ro melamgo 12 Ap mo levenaleng lavalabat atnedi diga reven tinotno ne Moroa gak lok lempanga sangsangu ro at lemelubu ro Soan ua ik lok keneng at lenep silok Isip. 13 Neni ga lox epeseves laras la ga lam avolo di ren; la ni ga lok mo lunep tas ga tu ngan luvat kapkapla. 14 At levenaleng kangking, neni gam lam di mi lovotakabu la at lengkanimin ni gam lam di mi langangao at laxao. 15 Neni gak lok pagam lemparuat to at lamatbin la gam taba di mi levendan boro xa xopok at lebelen laxangka. 16 Neni ga lok ladan kusu na sen su boro xeneng at lavaruat la ga lok mo ladan ga sesen ngan lavatdan silok.

17 Ketla di goxo xap tik lok leveloklok kakapmek ti ne Moroa, la digang tonga viribang at Leeme Avolo ro at lamatbin. 18 Diga lox asuusu rinotno i xusu dina lok tong ne Moroa keneng at levempapaase lolos atnedi ri leveluxa salai diga vavara rin. 19 Diga tere asu at ne Moroa xeretna, “Kereva, i epovo ne Moroa naba raba dik mi teveluxa de at na lamatbin? 20 I ruturun do neni ga viksa lavaruat, la ladan ga rem soobang su ngan ladanut; ketla kereva, i epovo bok do neni na raba bok mi lengkongkide la na raba limixin teren mi tempanga lomlomon?” 21 Kuren la Leeme Silok ga ronga di la ga belemamao aleng di; la neni ga lox asongot di mi laxao, la lebelemamao ren tinedi ga sisilok, 22 atla di goxo nuunu saga ren la di goxo nuunu bok do neni naba lox asepsu di. 23 Ketla neni ga vaase ri laxalibet no vana la ga tong i ri laramusaragu ren kusu na rem suang. 24 Ap mo levenaleng neni ga raba di mi lamaana boro vana at laxalibet. At na mun langas ni ga lox asu lempanga anan tinedi ri anan. 25 Kuren la diga anan leveluxa at lubung angelo, la ne Moroa ga lox epovo axap lavavara atnedi. 26 Neni ga lok bok lemere manman boronak kusu nat mas la ga ba pukus lamatmas at lemere manman boroxun, 27 la ni ga raba asu laxampixa ukopok ti limixin la diga buaang aleng ngan laxaniit kapulang nou loxon; 28 la digam subu ro xantubu at mo enemen la kangkan laraugu kadis. 29 Kuren la limixin diga vanan la diga anan mais; ne Moroa ga raba nedi mi lempanga ua nedi diga vavara i. 30 Ketla di goxok lox axap ba langaongao anan atnedi, kuren la move digara vanan. 31 At mo levenaleng ne Moroa ga belemamao di la ga sev amet nedi luvurau lolos avukat at leme Israel.

32 Ketla limixin di goxo doma mu i na levempanga la move digak lok leveloklok kakapmek, la lempanga sangsangu bok di goxo doxoma mu i la diga ke xepe lunuunu saga ren. 33 Kuren la neni goxo raba di mi lorooro avukat i lox abao, ketla ga lox axap leventooro atnedi mi langsangan lumumuat. 34 At lengkonaleng neni gap sev amet lentaba atnedi, nedi mo lentaba diga ba tepukus taba i; diga ngaleng la diga ngising tin mi lorooro axap atnedi. 35 Diga doma ka i do ne Moroa neni Lurutu See Pe at lorooro atnedi, la do mo Lanaraavuk ga vot kusu na lox asepsu di basinge levesongsongot. 36 Ketla levelinga atnedi ga umsu mi laxaxarang la goxopmen teruturun at levelinga atdi. 37 Di goxo ruturun tin; la di goxo mumu asu lekabus diga lox i eburu min. 38 Ketla ne Moroa ga belemumu di atla nedi limixin teren. Neni ga doxoma xepe leveng kakapmek atnedi la ni goxo sev amet nedi. Buaang laxanaleng neni gam tebeng amlong lumukmusak teren la gak lox asi mo lolos ap mo lebelemamao silok teren. 39 Neni gakleklen i do nedi limixin mun ua neni ga rudum nedi mi laxangka, la lorooro atnedi ixo babaalom, di lok ngan mun lamanman it mas polo la ira onon tino nga.

40 Digang tonga viribang solo ren to at lamatbin; la buaang mene nga laxanaleng digak lox antun i. 41 La digak lok tong pen amu amgo ne Moroa la digak lox abulu i, keke i do neni Leeme Melemelengan me Israel. 42 Diga domampe lolos silok teren, la mo bok laaleng ua neni ga lox aroo suu di basinge lavamunepen atnedi, 43 la ga lok bok levempanga sangsangu silok to at lemelubu ro Soan keneng at lenep silok Isip. 44 Neni ga vuk gili laradan ti lok ngan lada, la leme Isip di goxo ruuna tevendan ti inin. 45 Neni ga riki abeles laxanulang ukeneng tidi ua ga raba nedi mi losongsongot silok, la laxangkoak ua ga lok kapmek levenmenemen atdi. 46 Neni ga riki asu laxasixu ri anan levempeeve atnedi la ga lok kapmek axap leventaamang atnedi. 47 Neni ga sev amet larauna vaen mi lavatbet uat, la ga sev amet bok larauna angnu mi langsangan lumudut. 48 Neni ga sev amet laxanbulumaxao atnedi, mi lavatbet uat, la ga sev amet laxasipsip atnedi mi lavanga ga mam. 49 Ni ga lox abaava rinotno di at loxonaleng ni ga soobang asu lebelemamao sepsep teren, mo gat pot ngan ta luvuttadi vapaase axasep ti lanmet naba vot. 50 Neni goxo ranga alis lebelemamao ren kopla gita lox aroo nedi leme Isip, ketla ga sev amet di mi levenanmeres sepsep amet. 51 Neni ga sev amet laxamdak avot at lara koenasun axap me Isip.

52 Melemu neni ga lam asu limixin teren me Israel ngan laradi loklok tatao sipsip la ga lam avolo di ro lamatbin. 53 Neni gam lam aratao avukat di la di goxok marat; ketla laras ga repit pava lavamunepen atnedi la diga met axap pam. 54 Neni ga lam li di ro at lenep kangka xaala ren la uto at levengkaana no neni ga los kaka i. 55 Neni ga saksu mi limixin mego at levenaleng limixin teren diga pubeles; la ga vesinga laxangka atnedi xantubu at levenabung mixin me Israel, la gam taba limixin teren mi laramenemen atnedi limixin mego. 56 Ketla leme Israel diga ronga viribang at Lanaraavuk ne Moroa, la diga lok tong pen i mi leveloklok atnedi. Digoxo ronga res at Lenavolo ren, 57 ketla diga ronga viribang la di goxo ruturun tin ngan luvuttemen di, la digak lok ngan lososo xakauk ixo sixit akmokso. 58 Digak lox abelemamao i atla diga lotu saparap levemoroa xaxarang, la digak lox abelengatngas tinotno i mi laxampoovo moroa atnedi. 59 Moroa ga belemamao at loxonaleng ni ga ven mo lempanga; kuren la ni ga sok sisixe axap tino limixin teren. 60 Neni ga on basinge rino loogu kadis teren to Silo, ni lanemen ua neni gak lok teren kantubu at limixin teren. 61 Neni ga siam avolo lavamunepen atnedi xusu dina sak paxat ka lobokis at lekabus, neni mo loklok poovo at lolos la lisisinang teren. 62 Neni ga belemamao limixin akmokso ren la ga ke xepe di xusu lavamunepen atdi nabap sev amet di. 63 Luvurau atlok diga remet at levenesep, la luvurau rixin di goxo ruuna bok ba tavatlok kusu ridi ri vepot atdi. 64 Lavamaasa diga remet keneng at leveloklok asongot, la lavamunepen digap sep pepe lavakin atnedi lavamaasa xusu dinoxok saxaanu.

65 La soso mun, Leeme Silok ga beleku kaxat, ga lok ngan ta do ni ga rakdu tuang ngan boro at lanunga; neni ga lox agagas lodoxoma ren ngan leeme lolos i inin laxadan vaen kusu ri gagas ti esep. 66 La neni ga sak tup tinotno mi lavamunepen teren la digak lok mamangan aleng amisik. 67 Ketla neni ga lox abulubun kepe livipisik li at ne Josep; la ni goxo soxolik ka lubung mixin me Epraem. 68 Ketla ni ga soxolik ka manga lubung mixin me Juda mi lakaana Saion, mo loxot ua lebelen ga tu rinotno i. 69 La neni ga vaxaru loogu laplavang tin go, i ngan lemenemen aulis teren noxun pana; neni ga lox atmatkun tinotno i ngan at na xa lavatkangka axap, la gak lok alolos i kusu naba nemen amisik kuren. 70 Neni ga soxolik ka lasaxaruki ren ne Devit ngan loorong; ni ga lam asu xaka i ro at loxot anan at laxasipsip, 71 ap mo loxot ua neni ne Devit gak lok tatao laxasipsip teren. La ne Moroa ga vaxaxis li i ngan loorong me Israel, ga neni laradi loklok aratao at limixin at ne Moroa. 72 Devit gak lok tatao nedi la goxo reven kepe tepentaba la neni gam gomgonga nedi mi lodoxoma avukat teren.